ID 1374
კონკურსი საგამოძიებო ჟურნალისტიკაში

კონტაქტი

ნინო სტავრიდი

დეტალური ინფორმაცია

საქართველო

თანდართული ფაილი: 327676_CONTEST_ENTRY_FORM_shining_light_6312202.zip

კომენტარი

"ევროპის ფონდი" აგრძელებს სამოქალაქო მონიტორინგისა და ადვოკატირების ძალისხმევის მხარდაჭერას, საქართველოში ანგარიშვალდებული, გამჭვირვალე და საჭიროებაზე დაფუძნებული საჯარო პოლიტიკის შემუშავების ხელშეწყობისათვის. ამ მიზნით ევროპის ფონდმა დაიწყო ახალი ინიციატივა - საგამოძიებო ჟურნალისტიკა ცვლილებებისათვის, რომელიც მიმართულია მედიასა და ადვოკატირების ჯგუფებს შორის თანამშრომლობის ხელშეწყობისაკენ ცუდი მმართველობის შემთხვევების გამოსავლენად. მეტი გამჭვირვალობისა და საზოგადოებისათვის მნიშვნელოვანი საკითხების გაშუქების უზრუნველსაყოფად, კრიტიკული ჟურნალისტიკის მხარდაჭერასთან ერთად, ინიციატივის მიზანია, რომ ჟურნალისტების მიერ გამოვლენილმა საკითხებმა ბიძგი მისცენ სამოქალაქო და/ან ინტერესთა ჯგუფების მობილიზებას კონკრეტული დადებითი ცვლილებების მისაღწევად.

ქართველი გამომძიებელი ჟურნალისტების მხარდაჭერისა და წახალისებისათვის, რომლებსაც მნიშვნელოვანი საკითხების გასაშუქებლად ხშირად სახიფათო და მტრულ გარემოში უწევთ მუშაობა, განურჩევლად სიუჟეტში მონაწილე პირების ვინაობისა, ევროპის ფონდმა გადაწყვიტა, საქართველოში საგამოძიებო ჟურნალისტიკის ჯილდოს დაწესება.

კონკურსი ეფუძნება გლობალური ჟურნალისტური კონკურსის (Global Shining Light Award) პრინციპებს, რომელიც ყოველ ორ წელიწადში ერთხელ იმართება საგამოძიებო ჟურნალისტიკის გლობალური ქსელის მიერ. საგამოძიებო ჟურნალისტიკის ქართული კონკურსი მიზნად ისახავს, გამოავლინოს და დააჯილდოოს ის ჟურნალისტები და მედია საშუალებები, რომლებმაც გამოააშკარავეს სიმართლე და ამავდროულად, ბიძგი მისცეს ფართო საზოგადოებრივ მობილიზაციას პასუხისმგებელი პირების ანგარიშვალდებულების მოთხოვნით ან მიაღწიეს სხვა ხელშესახებ ცვლილებას საქართველოს მოქალაქეთა საკეთილდღეოდ.

ამ მიზნით, ევროპის ფონდი იწვევს ჟურნალისტებს და მედია საშუალებებსა, წარადგინონ ჯილდოზე საგამოძიებო სიუჟეტები, რომლებიც 2020 წლის 1 იანვრიდან 2021 წლის 30 სექტემბრამდე პერიოდში გამოქვეყნდა.

ევროპის ფონდის შესახებ:

ევროპის ფონდის მისიაა, პრაქტიკული პროგრამების განხორციელებით, საშუალება მისცეს მოქალაქეებს, წვლილი შეიტანონ სოციალური სამართლიანობის დამკვიდრებასა და ეკონომიკური კეთილდღეობის ზრდაში, რათა გაუმჯობესდეს მათი და მათ გარშემომყოფთა ცხოვრება. მიზნობრივი პროგრამების მხარდაჭერისა და საგრანტო კონკურსების გზით, ევროპის ფონდი მიმდინარე სოციალურ, ეკონომიკურ და პოლიტიკურ მოვლენებში მოქალაქეთა აქტიურ თანამონაწილეობას უზრუნველყოფს, რაც ადგილობრივ, რეგიონულ და ეროვნულ დონეზე პოზიტიურ ცვლილებს უწყობს ხელს.

ფონდის მანდატი და მიდგომები ისეთ მიმართულებებს მოიცავს, როგორიცაა: სამოქალაქო მონიტორინგი, მტკიცებულებებზე დაფუძნებული ადვოკატირება და საჯარო პოლიტიკის შემუშავება, საზღვრისპირა და თემთაშორისი თანამშრომლობა, გენდერული თანასწორობა და საჯარო და კერძო სექტორებს შორის თანამშრომლობა. ევროპის ფონდი შემდეგ პროგრამებს ახორციელებს: თანამონაწილეობა და მონიტორინგი ცვლილებებისთვის, ახალგაზრდული ინტეგრაცია, ევროპული ინტეგრაცია, სოციალური მეწარმეობის განვითარება და ღია კარის საგრანტო პროგრამა. ფონდის პროგრამები ერთობლივად უწყობს ხელს ფონდის მისიის შესრულებას და შესაძლებლობას აძლევს მოქალაქეებს ჩაერთონ სოციალურ, ეკონომიკურ და პოლიტიკურ მოვლენებში, ადგილობრივ და ეროვნულ დონეზე პოზიტიური ცვლილებების მისაღწევად.

აღწერა:

თავისუფალი და დამოუკიდებელი მედია მნიშვნელოვან როლს თამაშობს სტაბილური დემოკრატიის ჩამოყალიბებაში. მიუხედავად იმისა, რომ მედია სექტორის გაძლიერებისა და ჟურნალისტების უნარ-ჩვევების გაუმჯობესების კუთხით გარკვეული მიღწევები შეინიშნება, პროგრესი მაინც არათანაბარია და ხელისუფლების მხრიდან მედიის კონტროლის მცდელობებით ხასიათდება. დღესდღეობით, მედიაგარემო უკიდურესად პოლარიზებულია და ხელისუფლების წარმომადგენლები ფორმალური და არაფორმალური ბერკეტებით ერევიან მედიასაშუალებების მუშაობაში. მაშინაც კი, როდესაც მზადდება საგამოძიებო მასალა სახელმწიფო ინსტიტუტებში კორუფციის, ან საზოგადოებისათვის დამაზიანებელი პოლიტიკისა და პრაქტიკის გამოვლენის კუთხით, ეს მცდელობები არ იწვევს რეალურ ცვლილებებს მოქალაქეებისათვის.

საგამოძიებო ჟურნალისტიკა დაკავშირებულია ხანგრძლივ დროსა და ფინანსურ რესურსებთან და დამოუკიდებელი მედიასაშუალებები ხშირად ვერ უზრუნველყოფენ თემის სიღრმისეულ მოცვას. საქართველოში არსებული მყიფე მედიაგარემოს გათვალისწინებით, ევროპის ფონდმა დაინახა კომპლექსური მიდგომის საჭიროება და შესაბამისად, გადაწყვიტა მხარი დაუჭიროს ფაქტებზე დაფუძნებულ საგამოძიებო ჟურნალისტიკას, რათა ხელი შეუწყოს მოქალაქეთა ცხოვრების გაუმჯობესებას და დემოკრატიული, სამართლიანი ერის ჩამოყალიბებას.

საგამოძიებო ჟურნალისტიკის მხარდაჭერით ევროპის ფონდი ასრულებს თავის მისიას და მოქალაქეებს სთავაზობს მექანიზმს მთავრობის, ბიზნესისა და სხვა ინსტიტუციების ანგარიშვალდებულების უზრუნველყოფისთვის.

ვის შეუძლია განაცხადის წარდგენა:

განაცხადის წარდგენა შეუძლია საქართველოში მოქმედ ყველა მედიასაშუალებას (ბეჭდური, ონლაინ, რადიო და სატელევიზიო მედია), რომელიც ქართულ, უმცირესობების ან საერთაშორისო ენებზე ამზადებენ ჟურნალისტურ მასალას. კონკურსზე წარსადგენი სიუჟეტები გამოქვეყნებული უნდა იყოს ბეჭდური სახით, ონლაინ, რადიო ან სატელევიზიო ეთერით 2020 წლის 1 იანვრიდან 2021 წლის 30 სექტემბრამდე პერიოდში.

შერჩევის კრიტერიუმები:

ჟურნალისტები, ჟურნალისტთა გუნდი და/ან მედია საშუალებები წარადგენენ დამოუკიდებელ ჟურნალისტურ გამოძიებას, რომელიც:

• ჩატარდა საქართველოში და განიხილავს ქვეყნის დემოკრატიული მმართველობის გამოწვევებს;
• ნათელს ჰფენს ისეთ საკითხს ან საკითხებს, რამაც მძიმე ნეგატიური გავლენა იქონია საზოგადოებრივ კეთილდღეობაზე;
• გამოქვეყნდა 2020 წლის 1 იანვრიდან 2021 წლის 21 სექტემბრამდე პერიოდში;
• ჰქონდა ფართომასშტაბიანი სამოქალაქო კამპანიის წამოწყების პოტენციალი გამოვლენილი პრობლემების დაძლევის მიზნით.

გამარჯვებულთა შერჩევის კრიტერიუმები:

ჟურნალისტები, ჟურნალისტთა გუნდი და/ან მედია საშუალებები წარადგენენ დამოუკიდებელ ჟურნალისტურ გამოძიებას, რომელმაც:

• გამოავლინა პრობლემა, რამაც მძიმე ნეგატიური გავლენა იქონია საზოგადოებრივ კეთილდღეობაზე;
• უბიძგა საზოგადოებას ცვლილებების ადვოკატირებისკენ;
• გამოიწვია ხელშესახები შედეგები შესაბამისი პირების პასუხისმგებლობის დაყენების კუთხით და გააძლიერა გამჭვირვალობა და ანგარიშვალდებულება;
• მომზადდა სახიფათო პირობებში ან ძალადობის რისკის ქვეშ.

ჟიური:

კონკურსის ჟიური შედგება ადგილობრივი და საერთაშორისო მედია ექსპერტებისგან, სხვადასხვა საერთაშორისო ჯილდოს ლაურეატი ჟურნალისტებისგან, სამეცნიერო სფეროს წარმომადგენლებისგან.

დაჯილდოება:

გამარჯვებულები გამოვლინდებიან არაუგვიანეს 2021 წლის 10 დეკემბრისა.

მთავარი ჯილდო გადაეცემა საგამოძიებო სიუჟეტს, რომელმაც მნიშვნელოვანი დადებითი ცვლილება გამოიწვია ადგილობრივ ან ეროვნულ დონეზე.

გამარჯვებულებს მიეცემათ შესაძლებლობა, თავად შეარჩიონ მათ პროფესიულ საჭიროებებზე მორგებული პრიზები. პრიზების შესაძლო ვარიანტებია: სასწავლო ტური წამყვან საერთაშორისო ნიუსრუმში ან ინტენსიური კურსი უახლესი მედია ტენდენციების და ხარისხიანი საგამოძიებო სიუჟეტის მომზადების შესასწავლად, კომპიუტერული პროგრამების ან ინვენტარის შეძენა, პროფესიული საწევრო გადასახადები და ა.შ.

გამარჯვებულებს მიეცემათ შესაძლებლობა, მიიღონ დამატებითი მხარდაჭერა ევროპის ფონდის მხრიდან, ჩაერთონ გამომძიებელ ჟურნალისტთა საერთაშორისო კონკურსში, რომელიც ყოველ ორ წელიწადში ერთხელ ტარდება საგამოძიებო ჟურნალისტიკის გლობალური ქსელის მიერ.

ევროპის ფონდი იტოვებს უფლებას არ გამოავლინოს გამარჯვებულები, თუ ჟიური მიღებულ განაცხადების ხარისხს არადამაკმაყოფილებლად მიიჩნევს.

აპლიკაციის პროცესი:

განაცხადების მიღების ბოლო ვადაა ორშაბათი, 2021 წლის 25 ოქტომბერი, 18:00 საათი თბილისის დროით.

ქართულ ან უმცირესობის ენაზე მომზადებულ მასალებს აპლიკანტმა თან უნდა დაურთოს ქართულ ენაზე მომზადებული რეზიუმე ბეჭდური ან ონლაინ მასალის წარდგენის შემთხვევაში, ხოლო ეთერში გასული სიუჟეტის შემთხვევაში - მასალის ტრანსკრიპტი, რომელიც გადაითარგმნება ინგლისურად ჟიურის საერთაშორისო წევრებისათვის.

განაცხადების და ნომინაციების გაგზავნა შესაძლებელია ონლაინ შემდეგ მისამართზე: [email protected].

გთხოვთ, თანდართულ ფაილად იხილოთ განაცხადის ფორმა. გთხოვთ, სათაურის ველში მიუთითოთ "Investigative Journalism Award."

მეტი ინფორმაციისათვის დაუკავშირდით ქ-ნ ნინო სტავრიდს, პროგრამის მენეჯერს, მისამართზე: [email protected]